تقليل الإغتراب

  

افضل طريقة لمذاكرة الثانوية العامة والجامعة

 

اهلا بكم في مقاله جديده ان شاء الله النهارده هنتكلم عن افضل طريقه للمذاكره في الثانويه العامه والكليه واااااااو.

 انا بعتذر عن عنوان المقاله دي مفيش حاجه اسمها افضل طريقه لمذاكره الثانويه العامه والكليه ما فيش حاجه اسمها افضل طريقه.

 

 في طريقه ممكن تشتغل بالنسبه لي وممكن متكونش مناسبة بالنسبة لك وممكن تناسب حد ثاني لو انت جاي ومعتقد ان انا هديك خلطه سحريه كده هتخلى المذاكره ممكن متذكرهاش وتجيب اعلى الدرجات في ده مش حقيقي.

 اول حاجه نعرفها في مقاله النهارده ان ما فيش حاجه اسمها افضل طريقه ولكن فيه خطوات معينه لو اتبعتها هتقدر تخلي المذاكره اسهل بالنسبه لك وايسر بكثير من ان انت تذاكر كده او ان انت بتذاكر متائفف او بتذاكر علشان والدك او والدتك بيقولوا لك ذاكر او بتذاكر قهرا.

 

 حاجتين مهمين نوضحهم قبل ما نكمل المقاله

·      إن دي مش مقاله تنميه بشريه انا مش هقعد اقول لك ايوه شد حيلك والكلام ده لا ده حاجات انا مريت بها وبحاول الخصها وبحاول اشاركها مع الناس بحيث انك تستفاد منها.

 

·      وثاني حاجه كل الناس بتكره المذاكره ما فيش حد بيحب المذاكره انا ما بحبش المذاكره مفيش حد بيحب المذاكره  تمام مفيش حد بيحب المذاكره انت مش لوحدك.

 

تمام اترسخ عندك الفكرتين دول احنا هنتكلم عن ثلاث حاجات:

·      الدافع

·      افهم نفسك

·      الاولويات

 

وزي ما قلت لك ده مش كلام في الهواء دي حاجة او نظريه مشيت بها ومشيت معي و ممكن تمشي معاك وانا مش هاتكلم عن حاجه غير لما اكون مريت بيها ليس من سمع كمن رئا يعني ان انت تتكلم عن الحاجه بدون ما تاخدها من غير لما تخوض التجربه وتجيب الخلاصه فديه خلاصه التجربه بتاعتي في الثانويه العامه.

 

 الدافع

 

اكيد انت عارف اهميه الدافع ده هو البنزين اللي بيخليك تمش يعني لو انت عندك طاقه انك تذاكر وبعدين كان في فتره معينه انت كسلت هو اللي بيخليك تكمل هو اللي بيخليك تكمل مذاكره حتى لو انت تعبان حتى لو انت عايز تنام الدافع مهم جدا جدا.

 

 خذ وقتك في ان انت تدور على الدافع اللي هيخليك تذاكر يعني انت بتذاكر ليه بالنسبه لي برده بشارك الدافع بتاعي معكم.

 

 الدافع بتاعي ان انا كنت عايز ابسط ابي وامي كانوا تعبانين معي في الثانويه العامه وكل مصادر الاسره كانت مهيئه لرحتي انا واحتياجاتي فليه تستخسر فيهم السعاده بتاعت يوم النتيجه ده يعني ممكن تاخذ الدافع ده لو يناسبك اكيد طبعا.

 

 والدك والدتك هم اكثر ناس بيحبوا لك الخير وعايزينك تنجح رغم ان النجاح ده مش هياثر عليهم في حاجه نجاح ده ليك انت لكنهم بيفرحوا لما بيلاقوا انك ناجح ممكن تشوف الدافع ده لو مشى معاك تمام.

 

 لو مش كده شوف بقى ممكن يكون لك هدف غير ده ان انت مثلا عايز تكون راجل جامد جدا في الطب او الهندسه او لك غاية في حياتك عايز تحققها وليك هدفك في الحياه فانت راجل كده زي الفل ميه ميه.

 

 لو انت مش لاقي الدفع خذ وقتك خذ وقتك ان انت تدور على الدافع ايه اللي يخليني اذاكر ايه اللي يخليني ان انا اقعد على الكتاب فتره طويله من غير ما امل الدافع مهم جدا جدا خذ وقتك في ان انت تدور على الدافع.

 

 

 ثاني حاجه افهم نفسك

 انت وجودك او كيانك كده بني ادم او كشخص مكون من ثلاث حاجات

·      جسمك

·      وروحك

·      وعقلك

 

 يعني متعتقدش ان عقلك جزء من جسمك لا هو مخك جزء من جسمك لكن عقلك لا, عقلك هو السوفت وير اللي بيشغل مخك في

·      جسمك بعدين

·      روحك وبعدين

·      عقلك اللي هو السوفت وير يعني المخ هاردوير جزء من المخ والعقل سوفت وير هو اللي بيشغل المخ

 

 علشان تعلى في الثانويه العامه انت محتاج قواك العقليه تكون جامده جدا الذاكرة بتاعتك كويسه جدا انت ازاي تقدر تحقق الموضوع ده لو اعتمدت بس ان انت تنمي عقلك من غير الجزئين الثانيين هتتعب جدا لان الثلاثه محتاجين بعض علشان يعلوا.

 

 يعني مثلا انت قعدت اذاكر متوتر وعليك ضغط عصبي وضغط نفسي لو طلعت لعبت رياضه او طلعت جريت مخك هيفرز هرمون الاندروفين وده هرمون السعاده يعني هتنبسط وجسمك هيريحك من التوتر اللي عليك.

 

 كذلك برده الصلاه الجانب الروحي بقى لما تكون قريب من ربنا بيديك هدوء وسكينه و حاجه غريبه كده تحس بها.

 

 الثلاثه دول لو عليتهم مع بعض هيعلوا بسرعه انما لو ركزت على جانب واحد بس بيحاول يشد الباقيين فهيبقى في صعوبه ان هو يطلع بسرعه.

 

 حاول توفق ما بين الثلاثه ذاكر إلعب رياضه روح الجيم او اجري وبعدين الجانب الروحي طول لما انت قريب من ربنا بيكون عندك ايمان باللي انت بتعمله ان انت جزء من حاجه كبيره جدا بتحس ان انت لك هدف اسمى من اللي انت بتعمله وفي احاديث عن طلب العلم والعلماء فبتحس فعلا ان انت جزء من حاجه كبيره.

 

 عقلك مش هيطلع لوحده يعني انت مش هتقعد كده كسلان جسمك ثقيل وكسلان وبرده بعيد عن ربنا صعب ان انت تفهم الموضوع هيبقى صعب ممكن يحصل بس هيبقى صعب ورخم.

 

 لو ماهتميتش بجسمك بالرياضه واهتميت انك قريب من ربنا هتلاقي الجانب ده بيطلع بسهوله جدا لانه مبيطرش يشد الاثنين اللي معه بالعكس هم الثلاثه بيكملوا بعض اتمنى ان الفكره تكون وصلت انت كيانك او وجودك جسم وروح وعقل ماينفعش واحد يطلع ويسيب الاثنين الباقيين تحت هيطلعوا بسرعه لو طلعوا مع بعض.

 

 لكن لو طلع واحد لوحده هيشيل ثقل الاثنين الباقيين عشان يطلعهم معاه الموضوع هيبقى بطيء وصعب.

 

 اخر حاجه معانا اللي هي الاولويات

 

  ترتيب الاولويات من الحاجات اللي بتسهل عليك الموضوع جدا هاقول لك مثال لو انت مثلا عندك واجب او عندك مسئلة لازم تحلها او جزء لازم تذاكروا واصحابك رايحين يلعبوا كوره تعمل ايه الاول يعني انت عندك الوقت تعمل الاثنين تعمل ايه الاول هل تروح تلعب كوره بعدين تذاكر ولا تذاكر وبعدين تروح تلعب كوره.

 

 انت هتعمل الاثنين يعني انت كده كده هتلعب وكده كده هتذاكر طب خلينا ندرس الاحتمالين انت هتروح تلعب كوره طول ما انت بتلعب كوره دماغك مشغول بالمذاكره والنفس اللوامه عماله تقول لك انت وراك مذاكره هتذاكر امتى في حاجه شاغله دماغك ومشيلاه هم المذاكره حتى وانت بتلعب.

 

 انت هتروح تعبان متضايق شايل هم المذاكره زعلان من نفسك في احتمال كبير مش هتذاكر.

 

 لكن لو ذاكرت وجيت على نفسك كده وذاكرت فعلا  وخلصت الجزء المطلوب منك وبعدين رحت لعبت كوره هتلعب كوره وهتستمتع 10 اضعاف الاستمتاع العادي.

 

 لان هيبقى انت ذاكرت بقى وجمعت قواك العقليه وركزت جدا فانت عندك حماس وحاسس انك عايز تتحرك فهتروح تجري وتلعب كوره ثاني حاجه هتبقى بمثابه مكافاه لك يعني انت ذاكرت طب تكافئ نفسك بانك تلعب كوره مهمه جدا حته المكافاه دي ترتب اولوياتك اعمل كل حاجه مبقولكش متلعبش اللعب مهم جدا والرياضه مهمه جدا وانك تستمتع وترفه عن نفسك مهم جدا جدا ولكن رتب اولوياتك.

 

 مفيش حد بياخذ المرتب وبعدين بيشتغل الناس بتشتغل وبعدين بتاخذ المرتب في الاخر فكذلك خليك كده مش عايز اطول عليكم اكثر من كده خاصتا ان الناس هتبدا ثانويه وهيبدئوا يتعمقوا في الموضوع اتمنى ان المقاله دى تساعدكم.

الحمد الله وصلت بالسلامة لاخر سطر اتمنى انك استفيد من المقالة دي

                                                         وشكراً